De Cavalliere, e kurze Begegnung mit de Halb- und Unterwelt

“Manchmal kommen die Geschichten einfach so zu einem, oft aber auch einfach wieder zurueck“.      Ilija Trojanovich. 

Dass mer Träum lebe muess und sie nit nu träume soll, des isch e aalti Muck. On vu dene Träum hommer vor so 10 Johr au mol glebt. Mit em Aahänger wo iisern Waidling druff war, simmer dorchs Gotthardloch an grosse Lago gfahre. A de Feriewohnung hommer de selberbaut Waidling is mollig warm Ticino Wasser, in Lago Magiore glau. Tagelang simmer uff dem Wundermärli See ummegondlet. Isola Pescatore, Isola Bella, Isola Madre, Isola Brisago,…… wa ver e barocks Bella Italia.

Und zmols kunnt doch no e moderns Märli ums Eck. Noch eme Staatsakt vor paar Woche ebe au wieder zruck. Natierli giehts bei dere Gundelerei jede Mittag au e stilvolle Capuccino Paus im idyllische Ristorante “Grotto Santa Maria”. Sell trohnt hoffärtig und erhaabe uff eme Felshogge überm Lago mit eme herzige, gmuetliche Gartecaffe. Am felsige Aaleger räcklet sich im milde warme Wasser e schöni, kultigi Mahagoni Diva, e “Riva” Motorjacht. Frech und selbsbewusst vertäuet  mir iisern sibirische Lärche Waidling mit em schneewiiesse Boge Sunnesegel nebet der Nobel Gundel. Iiseri ganz im stil vum Giovanni Segantini Stimmungsbild “Abenstille überm Brianza See”. E steili, schmali Stoetreppe, kunstvoll in Kalkfels innighaue, goht uffi is Gartecaffe mit Bella Vista über de Lago. Vor de letschte Stapfle will en galante, untersetzte Signore mit breitem und bis id Kopfmitte reichendem Gsiecht und mit trollige Auegli, wo en rappeschwarze, gfärbe Hoorkranz aasetzt, au s steil Stegli aabi. Hinter ihm 3-4 sportliche, saloppe, maritim uusstaffierte, uustrainierte Prachts- Papagalli. Die rechte Hosesaeck dietlich uusbeulet vu me kantige, spitzige Gegestand.

Generös loot de Capo, de Senjore, dere uffitrepplende Senjora mit em chicke Florentiner Strauhietli de Vortritt. Natierli nit uhni dere vu obe aabi tief in summerliche Uusschnitt z spickle. Au mich loot er no ganz uffi krattle. Noch em brave “Grazie” und “Buon Giorno, Senjore”, frogt er, wo mir herkumme dajet und wo die “Bella Barca” dehoem wär und wie die  do uff sin Lago kumme wär? Mit paar Brocke tschinkisch und eweng Englisch, wa er und ich nit guet kinnet, erkläret mir ihm, dass iiser Hoemetgwässer de “Lago di Constanza, e de Fiume lungo Rhenus” sei. “Oh la la, benissimo, pico bello”, auf dem Lago wolle er schon lange mal rumschippern, aber,…. scusa, molto lavorare in roma e milano e tuto euro “, radebrecht er über seinen Traum vom Lago Constanza. Sin Troom war aber Schaum, iisern isch glebt wore. “Arrevederchi, chiao bella, buon vacance con belissima barca”. So trepplet er aabi zu de stolze Mahagoni Gondola “Riva”. Die galante Bimbos mit de uusbeulte Hosesäck lichtet d Leine und die ville Pferdestärke unterm Mahagonideck ziehnet e riese Forri dorch de friedlich See. 

Dobbe aber im Grotto Caffe isch grosse Uffregung und wilds Palaver. Ganz grosses Italo Kino. ´De Patron goht stolz wie en Pfau vu Tisch zu Tisch und verzehlt aageberisch de Gäscht, ganz uffbloose, dass des sin Stammgascht wär und der villmol käm zum Uusspanne vu dene herte, Politische- und Mediegschäfter, und…., natürli: vu dene erschöpfende bunga-bunga Fiestas. Wenn er e Problem heb, speziell mit de Guarda Finanza, sait de Cavallieri immer zu ihm, soll ers ihm, im Grande Patrone, im Cavalliere Silvio sage…., er dais denno regle. Des Parliamento höre mer us denne affige, grossspurige Pfaue Gspräch guet ussi. Die Geschtik erklärt de Rescht.  

Und jetzt kunnts iis : Des war doch der mit de gliftete Larve und dem mit Botox inni operierte Dauergrinse. Ha jooo bigott, des war de trollig Schemme- Silvio. 
“Sic transit Gloria Mundi”, kennt mer jetzt noch de Abdankung z Milano sage. E kurzi, jähe Begegnung mit de reale Weltgschicht. 

Lago Maggiore Settembre 2013 

A de Beerdigung ware mer aber trotzdem nit. De Grossvatter Felix hät all gsait, a dem sii Beerdigung gang i nit, der goht au nit a mini. Ob er, wie die Wikingerkoenig, au i sim Mahagoni Schiff  bestattet wore isch ? 
De Patrone vum Grotto aber, sin ganz guete Amico, vum Grotto “Santa Maria” , der war bestimmt erschütterte Ehregascht am grandiose Staatsbegräbnis vu sim fürsorgliche Patrone, vum Grande Cavalliere e Capitano di Barca Mahagoni “Riva”, beim sim Caro Amico Silvio.

Sic transit gloria mundi
caro amico