Rauhriiff Strahleglanz

Gschechteverzeller sottet konni Bewies hinverribringe
Sie sottet Träum hinterlau
Dene mir aagregt nohsinniere kennet

D Schwiizer Nationalhymne, de schwülschtig „Schwiezer Psalm“, fang aa mit „ Trittst im Morgenrot daher, seh ich dich im Strahlenmeer ……..„. S Zindelststoener Bahhöfle erstrahlt noch knackige Rauhriif- Frostnächt noch über 50 Johr au wieder im glitzige, kristallne Rauhriif Strahlekranz. Obwohl des Bregtalbähnli scho vill Johr still gleit isch, des legendär, hölzern Zindelstoener Bahhöfle abmuntiert wore isch, und die Holzverladerampe vum zwei gleisige Bahhof im me Waldstreife grad wieder vu de Natur zruckeroberet word, strahlt des Relief- Bahhöfle wieder bei me Riife, nit i me Strahlemeer, aber i me Eiskristallkranz.
1972 also isch de Goldig Schwellenagel vu 1895 us de Holzschwelle uussizoge wore und des herzig, segensriich Bregtalbähnli isch in en lange Schlummer gfalle.

S hölzern Bahhöfle mit de Doornkaat Werbung hät sich en Huverzover für fufzg Mark unter de Nagel grisse und en Bienstand druus baut. Aber au der isch zwischeziitlich leider vermauchet. Wurum die Norddeutsche Kornschnapsbrenner uusgrechnet z` Zindelstoe am Bahof gworbe hond, isch dem Werbeplakat schwer zum ablausche. Amend hond sie gwisst, dass die Beerliwieber i ihrne Heidelbeerkante hählinge so e Fläschli verschoppet hond. So en Kornfusel- Flachmaa hond sie gnitz no vor de Abfahrt is Bregtal an Halleberg beim Feroldi am Eschinger Bahhofskiosk iikromet. Au die Schaffner und Lokführer hond gern so en Schluck gnomme. Hät nit der Lokführer im Erinnerungs- Relief vum Künstler Heiner Graf eweng e roti Nase und d Schildkappe eweng schreeg uff ?

Oder hond nit au die hagebiechene Waldarbeiter und Schloepfer immer so en Buddel us de Wolterdinger Glasi im Vesperrucksack zwischem Speck- Ortmogge, de greichte Schwarzwurscht und em Ranke Buurebrot ghet ? Iipackt i druckergschärztem Ziitingspapier oder em letzte Konradsblatt.

D Gleis sind bald mol i Schmelzhochöfe verkochet wore. Amend isch des rostig Iise vu dem jetzt uffgstellte Bahhöfle- Lokomotive- und Langläuferrelief sogar us dem Aaltisse gwalzt wore ? De Hammricher Granit Bahschotter isch zu me andere herte Schotter, zu dene Mark und Pfennig, umgmodlet wore, also verscherblet wore. Und die überzellige Bahhöfle im Hammer, z Verrebach, Schönebach und em Rohrbe a Bürger verkipperet wore. S Rollmatrial, de Schienebus, de Rot Arnold, de sogenannt Jägermeister- Express, mit em legendäre Jägermeister Uffdruck, isch zum Toel verreist zu gütige Iisebahfreund i dene ihrne Museums Hangar. Zwei Wäge lieget im Fundus vu de Kandertäler Museumsbah und wartet mit wehmüetigem Hoemweh, dass sie amend bald emol vu Bregtäler Nostalgiker wachküsst werdet.
E Paar mol im Johr erstrahlt aber des Iisig, rostig Kultbahhöfle im strahlende Schneekristallglanz.
De Modellbau Faller us em Gietbach, hät des Bahhöfle eweng verhübscht und uffgmotzt, selli erfolgriich zu tausende verscherblet. De Name Zindelstein isch i IIsebähnlerkreis berühmt wore. Obwohl i de vor GOOGLE Ziit so guet wie kon gwisst hät, wo Zindelstein isch.

Die andere, frostfreie Täg im Johr muess de original Glas – Zindelstei, wo a dem Relief hanget, de Glanz vu de Burg Zindelstoe und em durch de Fallerbahhof berühmt Zinke Zindelstoe zum Blinke, zum „Zindeln“ und Erstrahle bringe.

Ja so wars, und so isches mit em langewige Bregtalbähnle